Huwag Mong Agawin Ang Lahat Sa Amin!
ni Joy W. J. Sonita
Kahit inaabuso
tao’y nagtatrabaho
maliit man ang sweldo.
Sa oras ng pagkain
wala nang maihain
kundi luha at asin.
Anak di mapag-aral
kahit leksyon na basal,
lumaking walang asal.
Bawal ang magkasakit,
lunas ipagkakait
sa taong bulsa’y punit.
Di ka makapapayag
na tao’y magpahayag,
hininga ay kinalag.
Ano pa ba ang kulang?
Dignidad n’lang naiwan…
Iyo pang dinungisan!
