Pasaway Ng Buhay Ko
ni W. J. Sonita
Likas daw matigas ang iyong ulo -
kahit anong gawing bilin sa iyo
di mo sinusunod nang buong-buo;
Ginagawa’y sariling diskarte mo.
Malakas ka raw sa nasa itaas…
kaya ka raw ganyan, mayro’n kang basbas;
Ikaw ri’y mayabang at abusado;
Ako’y magtatanong, ‘to ba’y totoo?
Tamad ka daw sa iyong obligasyon,
Mabagal magtrabaho at umaksyon;
Ayaw mong tumulong at mautusan
Lagi kang may nakahandang dahilan.
Namimili ka rin daw ng trabaho,
ayaw mo ng mahirap at mabaho;
Di ka sanay at lubhang madiriin
dahil sa angkang may-kaya ka galing.
At sari-sari pang mga asunto
ang reklamo nila laban sa iyo.
Dumating ang araw ako rin mismo
di nakatiis at naasar sa ‘yo.
Napikon ako’t nag-init ang ulo
Tamang sermunan ka ang naging trip ko.
Tahimik kang nakaupo’t nakinig
Sa ‘king tinurang iba’t ibang panig.
Nakita kong kulang ka sa paggabay,
ninais sanang gawin ang mahusay;
Di lang alam kung saan at paano
magsimula sa iyong pagbabago.
Sa lahat nang ito aking natanto,
may mabuti ka palang pagkatao;
Ang nakita sa iyong kayabangan
ay pagkahiya’t kakimian lamang.
Ika’y nagalak na kahit papa’no
sa iyo’y mayroong nagtitiyaga;
Nangangaral, nagbibigay ng payo
gumagabay at sumusuporta.
Ikaw nga’y lubos na nagpasalamat
na sa iyong buhay ako’y dumating;
Iyong naagapan ang mga lamat
sa buhay dulot ng maling gawain.
Kung noon ako’y nabubugnot sa ‘yo,
ngayon nama’y nais kong malaman mo:
Ako’y masaya sa ‘yong pagbabago,
ituloy mo kahit ako’y malayo.
‘Bigan, huwag mo sanang kalimutan,
may isang JOY kang naging kaibigan
na walang ninais at pinangarap
kundi tagumpay mo sa hinaharap.
/
